Алматыда ВОАД туннелінің алдындағы айырмада қымбат спорткар апатқа ұшырады. BMW M5 Competition көлігінің жүргізушісі Аль-Фараби даңғылымен шығыс бағытта келе жатып, айырмада кері бұрылып, батысқа қарай бет алған, деп хабарлайды Almaty.news ақпарат агенттігі.
Бұрылыстан шығу кезінде жүргізуші спорткардың мүмкіндігін және өз жүргізу дағдысын асыра бағалаған сияқты. Жағдайды күшейткені, 40 млн теңге тұратын шетелдік көлік дәл сол күні сатып алынған.
Куәгерлердің айтуынша, жүргізуші қуатты көлікті басқара алмай, жоғары жылдамдықпен бордюрге соғылып, бетон қоршауды қиратқан. Соққыдан көлік төбесімен аударылып, жол бойымен шамамен 10 метр сырғанаған.
Бақытқа орай, ауыр апатта ешкім зардап шеккен жоқ. Көлік салонында екі жас жігіт пен бір қыз болған. Оқиға орнына келген жедел жәрдем дәрігерлері жол-көлік оқиғасына қатысушыларды тексерген, алайда ешкімге көмек немесе ауруханаға жатқызу қажет болмады.
Оқиға салдарынан Аль-Фараби даңғылында екі бағытта кептеліс пайда болды. Бір бағытта жолдың ішінара жабылуына байланысты қозғалыс қиындаса, екінші бағытта апатты көлікті көру үшін баяулаған көрермендер кедергі келтірген.
Оқиға орнында жол полициясы қызметкерлері жұмыс істеп жатыр.
Бұған дейін Астанада жүк көлігінің дөңгелегі астында 46 жастағы велосипедші әйел қаза тапқаны хабарланған.