Алматының Алатау ауданында, Бауыржан Момышұлы мен Саин көшелерінің аралығында, ауданы 27 гектардан асатын жаңа демалыс, мәдениет және ойын-сауық орталығы пайда болады. Жобаны 2026-2027 жылдары іске асыру жоспарланған, деп хабарлайды Almaty.news ақпарат агенттігі.
Кешеннің басты ерекшелігі — серуендеу жағалаулары, демалыс аймақтары және көгалдандырылған қоғамдық кеңістіктері бар су каналы. Су жүйесінің айналасында заманауи саябақ аумағы қалыптасады, ол мегаполистің тұрғындары мен қонақтары үшін жаңа тартымды нүктеге айналады.
Жоба аясында қоғамдық, мәдени және коммерциялық нысандар кешені салынады. Сауда инфрақұрылымына ерекше көңіл бөлінген: мұнда сегіз түрлі коммерциялық секция орналасады, олар дүкендер мен бутиктерден бастап қызмет көрсету, отбасылық демалыс және қоғамдық тамақтандыру нысандарына дейінгі әртүрлі бизнес форматтарына арналған.
Кешеннің орталық алаңдарының бірі — әртүрлі гастрономиялық концепциялар мен әлем асханаларын біріктіретін заманауи фудкорт. Оның жанында концерттер, фестивальдар, кино көрсетілімдері, шығармашылық кештер және басқа да бұқаралық іс-шаралар өткізуге арналған ашық амфитеатр орналасады.
Жобада отбасылық демалысқа ерекше мән берілген. Кешен аумағында балалар орталығы, океанариум және көбелектер мұражайын салу жоспарланған. Бұл нысандар қала тұрғындарының демалыс мүмкіндіктерін кеңейтіп, Алматының жаңа туристік көрікті жерлеріне айналады.
Water Garden-ның сәулеттік доминанты — қала мен саябаққа панорамалық көрініс ашылатын бақылау алаңы бар мұнара.
Жобаны Almaty Invest ірі қалалық бастамаларды жүзеге асыру және инвестиция тарту жұмыстары аясында сүйемелдейді.
Дереккөз: Almaty.tv