Алматыдағы белгілі тұрғын үй кешенінің тұрғындары жертөледе жүргізіліп жатқан құрылыс жұмыстарынан қабырғаларда жарықтар пайда болып, қатты діріл сезілетінін айтып шағымданды, деп хабарлайды Almaty.news ақпарат агенттігі.
КТК телеарнасының мәліметінше, 12-қабатта тұратын Арсен Татаев болып жатқан жағдайды жертөледегі жұмыстармен байланыстырады.
Бірінші қабатта орналасқан А. Марғұлан атындағы Археология институтының қызметкерлері де дірілге шағымданып отыр. Олардың сөзінше, құрылыс техникасы жұмыс істегеннен кейін қабырғаларда жарықтар пайда болған.
Үй қожайындары қауымдастығының төрайымы Ирина Шмальконың айтуынша, тұрғындар құрылысшылардың рұқсат құжаттары бар-жоғын анықтауға тырысқан. Оның сөзінше, жертөледе үйдің маңызды инженерлік коммуникациялары өтеді.
Тұрғындар Алматы әкімдігіне және қалалық қала құрылысын бақылау басқармасына шағымданды. Ведомство нысан бойынша жоспардан тыс тексеру басталғанын хабарлады.
Сонымен қатар тұрғындар 50 жылдан астам уақыт бұрын салынған ғимараттың жағдайына құрылыс жұмыстарының кері әсер етуі мүмкін деп алаңдаулы.
Бұған дейін Петропавлда құрылысшылар адам сүйектеріне тап болғаны хабарланған болатын.