Алматы орталығында заңсыз салынған ірі қосымша ғимарат сүріле бастады. Онда бірнеше кеңсе мен қоғамдық тамақтану нысандары орналасқан, деп хабарлайды Almaty.news ақпарат агенттігі.
Қалалық әкімдіктің баспасөз қызметіне сілтеме жасаған NUR.KZ мәліметінше, Қала құрылысын бақылау басқармасының дерегі бойынша, Назарбаев даңғылы, 220/3 мекенжайындағы ең ірі қосымша ғимаратты бұзу жұмыстары басталған. Жоспардан тыс тексеру барысында нысанның рұқсат құжаттарының толық пакеті жоқ екені анықталған. Сонымен қатар, ғимараттың бір бөлігі жалпы пайдаланудағы жерге салынған.
«Меншік иесіне қатысты әкімшілік шаралар қолданылып, одан кейін екі жылға жуық сот талқылауы өтті. Істі қарау қорытындысы бойынша Алматы қалалық сотының 2025 жылғы 17 қарашадағы қаулысымен нысанды мәжбүрлеп бұзу туралы шешім қабылданды», — деп түсіндірді басқармада.
Бүгін, 26 маусымда, әділет департаментінің сот орындаушыларының қатысуымен бұзу жұмыстары басталды.
Дереккөз: Nur.kz