Алматы метросының вагонында екі жолаушы арасындағы жанжал бейнежазбаға түсіп, полиция екі тарапты да жауапкершілікке тартты, деп хабарлайды Almaty.news ақпарат агенттігі.
Алматы қалалық полиция департаментінің Instagram парақшасында хабарланғандай, ер адам мен әйел арасындағы кикілжің «Райымбек» және «Абай» станцияларының аралығында болған.
Полиция мәліметінше, жанжал қоғамдық тәртіпті бұзумен және айналадағы жолаушыларға құрметсіздік танытумен қатар жүрген. Осы дерек бойынша екі азаматқа да ұсақ бұзақылық фактісі бойынша әкімшілік материалдар жиналған.
«Жанжал туындап, ол қоғамдық тәртіпті бұзумен және айналадағы жолаушыларға құрметсіздік танытумен қатар жүрді. Осы дерек бойынша екі азаматқа да ұсақ бұзақылық фактісі бойынша әкімшілік материалдар жиналды», — деп хабарлады полициядан.
Сот шешімімен әйелге 20 айлық есептік көрсеткіш мөлшерінде, яғни 86 500 теңге көлемінде айыппұл салынды, ал ер адам 15 тәулікке әкімшілік қамауға алынды.
Полиция азаматтарды тыныштық сақтауға, айналадағыларды құрметтеуге және қауіпсіздік пен жайлылық әркімнің мінез-құлық мәдениетіне тәуелді қоғамдық орындарда жанжалды мінез-құлыққа жол бермеуге шақырады.