Алматы метрополитенінің баспасөз қызметі вагондарда кейбір көлік құралдарын тасымалдауға жаңа шектеулер енгізілгенін хабарлады, деп хабарлайды Almaty.news ақпарат агенттігі.
Метрополитеннің Instagram-парақшасында «Алматы қаласы метрополитенінде жекелеген жүріс құралдарын тасымалдауға шектеулер енгізу туралы» бұйрыққа сілтеме жасап, енді метро құрамында кейбір көлік құралдарын алып жүруге және тасымалдауға тыйым салынатыны айтылған.
Жаңашылдықтың мақсаты – жолаушылар мен метро қызметкерлерінің қауіпсіздігін қамтамасыз ету, сондай-ақ көліктік және өрт қауіпсіздігі деңгейін арттыру.
Алматы метросында тасымалдауға тыйым салынғандар:
- электровелосипедтер;
- электросамокаттар;
- велосипедтер (балалар велосипедтерінен басқа);
- роликті тақталар (скейтбордтар);
- электромонодөңгелектер (моноциклдер) және басқа да осыған ұқсас жүріс құралдары.
Шектеулер мыналарға қолданылмайды:
- қаптағы бүктемелі электрлік емес велосипедтер;
- қаптағы бүктемелі электрлік емес жүріс құралдары;
- балалар арбалары;
- мүгедектер арбалары.
Қала тұрғындары мен қонақтарын енгізілген шектеулерді түсіністікпен қабылдап, метрополитенді пайдаланудың белгіленген ережелерін сақтауға шақырады.
Дереккөз: Nur.kz