Алматыда қалалық туризм басқармасының басшысы Галия Токсеитова Қытайдың Харбин қаласының делегациясымен кездесті. Делегацияны Харбин халық үкіметінің сыртқы істер кеңсесі басшысының орынбасары Ван Нин басқарды, деп хабарлайды Almaty.news ақпарат агенттігі.
Тараптар туризм, мәдени алмасу, креативті индустрия және екі қаланың туристік әлеуетін ілгерілету салаларындағы ынтымақтастық перспективаларын талқылады.
Қысқы туризмді дамытуға ерекше назар аударылды. Харбин Қытайдың мұз-қар туризмінің жетекші орталықтарының бірі болса, Алматы халықаралық деңгейдегі заманауи тау шаңғысы және рекреациялық орталықты қалыптастыруға бағытталған Алматы тау кластері жобасын іске асыруда. Осыған байланысты кездесуге қатысушылар туристік инфрақұрылымды дамыту және халықаралық қысқы іс-шараларды ұйымдастыру тәжірибесімен алмасты.
Сондай-ақ туристік алмасуды кеңейту, туристік өнімдерді бірлесіп ілгерілету және екі қала арасындағы тікелей байланыстарды дамыту мәселелері қарастырылды.
Қытай Алматының басым туристік нарықтарының бірі болып табылады. 2026 жылдың бірінші тоқсанының қорытындысы бойынша Қытайдан келетін туристік ағым 14%-ға өсіп, 23 890 адамға жетті. Қытай өңірлерімен серіктестікті дамыту туристік байланыстарды нығайтуға және екі елдің туристік мүмкіндіктеріне өзара қызығушылықты арттыруға ықпал етеді.
Дереккөз: Almaty.tv