Қазақстанның бірқатар қаласында, оның ішінде Алматы мен Атырауда ауа сапасының нашарлауы күтілуде, деп хабарлайды Almaty.news ақпарат агенттігі.
«Қазгидромет» РМК мәліметінше, қолайсыз метеорологиялық жағдайлар (ҚМЖ) – бұл ауаның төменгі қабатында зиянды заттардың жиналуына ықпал ететін қысқа мерзімді метеорологиялық факторлардың (тымық, әлсіз жел, тұман, инверсия) жиынтығы.
Мұндай жағдайда қала тұрғындарына ашық ауада, әсіресе автокөлік жолдарының немесе басқа да ластану көздерінің жанында болу уақытын қысқарту ұсынылады. Өкпенің созылмалы аурулары, жүрек-қан тамырлары және аллергиялық аурулары бар адамдарға ашық ауада жүргенде қажетті дәрі-дәрмектерін өзімен бірге алып жүру керек.
Бұған дейін синоптиктер Қазақстандағы қатты ыстықтың басылатынын және елдің барлық дерлік аймағында жаңбыр жауатынын ескерткен болатын. Алдағы қолайсыз ауа райына байланысты 2026 жылғы 18 тамызға ҚР-ның 15 облысында дауылды ескерту жарияланды.