Алматыда өткен кезектен тыс XLVII сессияда депутаттар кәсіпкерлікті қолдау, қоршаған ортаны қорғау, сумен жабдықтау және су бұру жүйелерін дамыту мәселелерін қарастырды, деп хабарлайды Almaty.news ақпарат агенттігі.
Сессияның маңызды шешімдерінің бірі – «Almaty Business – 2030» кәсіпкерлікті дамытудың өңірлік бағдарламасына өзгерістер енгізу. Өзгерістер шағын және орта бизнес субъектілерінің қаржылық қолдау шараларына қолжетімділігін кеңейтуге, қолданыстағы қаржыландыру тетіктерін жетілдіруге және бағдарламаның тиімділігін арттыруға бағытталған.
Алматы қаласы Кәсіпкерлік және инвестициялар басқармасының басшысы Берікбол Мандибаевтың айтуынша, енгізілген өзгерістер бағдарламаны іске асыру тәжірибесі мен қалалық бизнестің өзекті қажеттіліктерін ескере отырып қалыптастырылған.
Атап айтқанда, өндірістік кәсіпорындардың бағдарламаға қатысу мүмкіндіктері кеңейтіледі. Жеңілдікті қаржыландыру тек шағын өндірістік парктердің резиденттеріне ғана емес, қаланың барлық өндірушілеріне қолжетімді болады.
Сонымен қатар, мектепке дейінгі білім беру, туристік саланы дамыту, сондай-ақ атмосфераға ластаушы заттардың шығарындыларын азайтуға бағытталған жабдықтарды сатып алу жобаларын қаржыландыру мүмкіндігі қарастырылған.
Питомниктер, визит-орталықтар, санитарлық-гигиеналық нысандар, жәрмеңкелер және бірегей стационарлық емес сауда нысандарын салу мен жаңғырту есебінен қолдау көрсетілетін бағыттар тізбесі кеңейтілді. Әлеуметтік кәсіпкерлер үшін кепілсіз несиелеу бойынша салалық шектеулер алынып тасталды.
Қабылданған өзгерістер шағын және орта бизнес субъектілерінің мемлекеттік қолдау шараларымен қамтылуын арттыруға, жеңілдікті қаржыландырудың қолжетімділігін күшейтуге және Алматы қаласында кәсіпкерлік бастамаларды іске асыру үшін қосымша жағдайлар жасауға мүмкіндік береді деп күтілуде.
Экологиялық күн тәртібі аясында депутаттар Алматы қаласының қоршаған ортасын қорғау жөніндегі 2026–2028 жылдарға арналған іс-шаралар жоспарын қабылдады. Құжат 9 негізгі бағыт бойынша 43 табиғат қорғау іс-шарасын қамтиды. Олардың ішінде – атмосфералық ауаны, су объектілерін қорғау, жағалау және су экожүйелерін қорғау, жануарлар мен өсімдіктер дүниесін сақтау, қалдықтармен жұмыс істеу, радиациялық, биологиялық және химиялық қауіпсіздікті қамтамасыз ету, экологиялық менеджмент пен үздік қолжетімді технологияларды енгізу, сондай-ақ ғылыми-зерттеу жұмыстарын жүргізу. Жоспар ҚР Экология және табиғи ресурстар министрлігімен келісіліп, қоғамдық тыңдаудан өткен және қаланың экологиялық міндеттерін ескере отырып жыл сайын жаңартылып отырады.
Депутаттар сондай-ақ Алматы қаласын 2040 жылға дейін сумен жабдықтау және шаруашылық-тұрмыстық кәріз жүйесін дамыту жоспарын бекітті. Болжамдар бойынша, 2040 жылға қарай Алматы халқы 3,6 млн адамға жетуі мүмкін. Қазірдің өзінде қала аумақтарының шамамен 40% шығын сағаттарында су тапшылығын сезінуде. Құжат мегаполистің су қауіпсіздігін қамтамасыз ету үшін сумен жабдықтау және су бұру жүйесін кешенді жаңғыртуды көздейді.
Жоспарда «Ақсай», «Қарғалы» және «Нұрлытау» сүзгі станцияларын іске қосу, Талғар су құбырларын реконструкциялау, 2 450 шақырымнан астам су құбыры желілерін салу және жаңғырту, кәріз тазарту қондырғыларын тәулігіне 640 мың текше метрден 960 мың текше метрге дейін кеңейту, ұзындығы 35 шақырым болатын Батыс кәріз коллекторын салу, сондай-ақ сумен жабдықтау жүйесін басқарудың цифрлық технологияларын енгізу қарастырылған.
Сондай-ақ сессия барысында депутаттар Алматы қаласы бойынша Тексеру комиссиясының мүшесін қызметінен босату және мәслихат депутаты Жандос Нәдіровтің өкілеттігін мерзімінен бұрын тоқтату мәселелерін қарады.
Дереккөз: Almaty.tv