Алматы қалалық кардиология орталығы Joint Commission International халықаралық аккредитациясынан өтті, деп хабарлайды Almaty.news ақпарат агенттігі.
Қазақстан Денсаулық сақтау министрлігінің мәліметінше, орталық осындай аккредитацияға қол жеткізген еліміздегі тұңғыш қалалық клиника және жедел кардиологиялық көмек көрсететін мамандандырылған орталық болды.
JCI халықаралық сарапшылары сыртқы аудитті 2026 жылғы 19–21 тамыз аралығында жүргізді. Мамандар клиникалық үдерістерді, дәрілік және хирургиялық қауіпсіздікті, инфекциялық бақылауды, тәуекелдерді азайту жұмысын және емдеудің барлық кезеңіндегі сапаны бақылау жүйесін бағалады.
Қалалық кардиология орталығы халқы 1,1 миллионнан астам адамға жоғары технологиялық медициналық көмек көрсетеді.
2026 жылдың сегіз айында мұнда 7,5 мыңнан астам пациент стационарлық ем қабылдады. 9 мыңнан астам операция мен процедура жасалды — бұл өткен жылдың осы кезеңімен салыстырғанда 35,5%-ға артық.
Осы кезеңде күрделі кардиохирургиялық, аритмологиялық және интервенциялық араласулар саны 43,2%-ға өсті.
2025 жылы орталық базасында алғаш рет жүрек трансплантациясы жасалды.
Кардиоорталықта JCI аккредитациясын алу ұйымның медициналық көмек сапасы мен пациенттер қауіпсіздігі саласындағы халықаралық талаптарға сәйкес келетінін растайды.
Аккредитация сондай-ақ отандық медицинаның бәсекеге қабілеттілігін арттыру мен медициналық туризмді дамыту жолындағы қадамдардың бірі ретінде қарастырылады.
Бұған дейін Алматының №7 қалалық клиникалық ауруханасы дәрігерлері жамбас сүйегінің ауыр жарақатынан кейін ер адамды толық оңалтқаны туралы жазған болатынбыз.