Алматы әуежайында екі ер адамды әуе компаниясы өкілдерінің актісі бойынша көлік полициясы қызметкерлері рейстен түсірді, деп хабарлайды Almaty.news ақпарат агенттігі.
Тексеру барысында бұзушылардың 37 жастағы Алматы тұрғыны және 26 жастағы Түркістан облысының тұрғыны екені анықталды. Екеуі де мас күйінде болып, рейске тіркелу кезінде қоғамдық тәртіпті бұзған. Оның үстіне, кіші жолаушы былапыт сөйлеген.
Көлік полициясы департаменті бастығының бірінші орынбасары Теміржан Рамазановтың айтуынша, 37 жастағы жолаушыға қоғамдық орында мас күйінде жүргені үшін әкімшілік хаттама толтырылған. Ол бұрын да осындай бұзушылық жасағандықтан, материалдар сотқа жіберілді.
Екінші жолаушы бірден екі бап бойынша әкімшілік жауапкершілікке тартылды – қоғамдық орында мас күйінде жүру және ұсақ бұзақылық.
Көлік полициясы авиациялық және теміржол көлігі объектілерінде қоғамдық тәртіпті бұзу заңнамада көзделген жауапкершілікке әкеп соғатынын еске салды. Бұзушылар сапардан айырылып қана қоймай, әкімшілік, ал кейбір жағдайларда қылмыстық жауапкершілікке тартылуы мүмкін.
Дереккөз: Zakon.kz