Алматыда Орталық саябақтағы 5 гектар жер мемлекеттік басқаруға қайтарылды, деп хабарлайды Almaty.news ақпарат агенттігі.
Қалалық әкімдік Горький атындағы Орталық мәдениет және демалыс саябағының аумағындағы жер учаскелеріне жалдау шартын ұзартудан бас тартты.
— Бұл шешім «Алтын-Тараз» ТФК» ЖШС жалдаушысының аумақты абаттандыруға және инфрақұрылымды жақсартуға қаражат салмағанына байланысты қабылданды. Жалдау қатынастарын тоқтатудың басты себептерінің бірі — саябақ аумағын ұзақ уақыт бойы тиісінше күтпеу. Инфрақұрылым мен аттракциондардың едәуір бөлігі ескірген, ал қаланың басты демалыс аймақтарының бірінің жай-күйі тұрғындар тарапынан көптеген сынға ұшырады, — деп нақтылады қала әкімдігі.
Жалдаушы бұл шешімді сотта даулауға тырысты, бірақ сот талапты қанағаттандырудан бас тартты. Нәтижесінде саябақ аумағындағы жалпы ауданы 5 гектар болатын 94 жер учаскесі мемлекеттік басқаруға қайтарылды.
Енді әкімдік саябақты жаңғырту тұжырымдамасын әзірлеуді жоспарлап отыр: көгалдандыру жүргізу, заманауи демалыс аймақтарын құру және туристік және мәдени инфрақұрылымды дамыту.
Дереккөз: Inform.kz