Алматы қаласының әкімі Дархан Сатыбалды мен Алматы облысының әкімі Марат Сұлтанғазиев Алматы агломерациясының Жергілікті кеңесінің отырысын өткізді. Онда қала маңындағы әлеуметтік нысандар салу, экологияны жақсарту және көлік байланысын арттыру мәселелері қаралды, деп хабарлайды Almaty.news ақпарат агенттігі.
Тараптар экологиялық ахуалды жақсарту басты міндеттердің бірі екенін атап өтті. Қазір агломерациядағы 188 елді мекеннің 74%-ы газдандырылған, бұл 1,1 млн адамды қамтиды. Биыл бұл көрсеткішті 89,4%-ға жеткізу жоспарланған.
Көлік инфрақұрылымын дамыту аясында көлік-ауыстыру тораптарын салуға жер учаскелерін анықтау мәселелері талқыланды. Сондай-ақ әуежайдан БАҚАД-қа дейінгі ұзындығы 6,4 км автожолдың жобалау-сметалық құжаттамасы әзірленуде. Жобаны іске асыру үшін 52 жер учаскесін сатып алу көзделген, оның 23-і облыс аумағында орналасқан.
БАҚАД-қа шығатын алты радиалды жолды салу жобаларына ерекше назар аударылды. Бұл көлік қолжетімділігін едәуір арттырып, жол желісіне жүктемені азайтады.
Халық санының өсуіне және балалар санының көбеюіне байланысты 2026–2028 жылдары агломерацияның бірқатар елді мекендерінде жаңа білім беру мекемелерін салу жоспарланған. Атап айтқанда, Алматы облысының әкімдігі ең тығыз қоныстанған Іле, Қарасай және Талғар аудандарында үш ауысымды оқытуды жою және оқушы орындары тапшылығын азайту үшін 21 мектеп салуды көздеп отыр.
«Біз инфрақұрылымға жүктеменің өсіп келе жатқанын көріп отырмыз және қала деңгейінде де, бүкіл агломерация деңгейінде де аумақтарды кешенді дамытуға және адамдардың өмір сүру сапасын арттыруға баса назар аудара отырып, жүйелі жоспарлаудың маңыздылығын түсінеміз», — деді Дархан Сатыбалды.
«Газдандыру, көлік инфрақұрылымын дамыту және әлеуметтік нысандарға жүктемені азайту — бұл кешенді шешімді қажет ететін өзара байланысты міндеттер», — деп атап өтті Марат Сұлтанғазиев.
Дереккөз: Almaty.tv