Алматы билігі Family Park аумағына тұрғын үй кешендері немесе басқа нысандар салу мүмкіндігі туралы ақпаратты жоққа шығарды, деп хабарлайды Almaty.news ақпарат агенттігі.
Әкімдікте БАҚ пен әлеуметтік желілерде тараған мәліметтер шындыққа жанаспайтынын мәлімдеді. Қолданыстағы Бас жоспар мен қаланы егжей-тегжейлі жоспарлау жобасына сәйкес, Family Park аумағы қоғамдық рекреациялық кеңістік мәртебесіне ие және оның мақсатты тағайындалуын өзгерту көзделмеген.
Парк тұрғындар мен қала қонақтары үшін демалыс орны ретіндегі мақсатын сақтайды. Қазіргі уақытта тек аумақты кешенді реконструкциялау, абаттандыру және жаңғырту үшін мемлекеттік басқаруға қайтару мәселесі қарастырылуда.
Ведомствоның мәліметінше, жалға алушы көп жылдар бойы нысанды дамыту және күтіп-ұстау бойынша міндеттемелерін толық орындамаған, инфрақұрылымды жаңартуға қаражат салмаған, соның салдарынан парк құлдырауға ұшыраған.
Әкімдікте Family Park инженерлік және рекреациялық инфрақұрылымды жаңғыртуды, сондай-ақ аз қозғалатын азаматтар үшін заманауи кедергісіз орта құруды қажет ететінін атап өтті.
Дереккөз: Inalmaty.kz