Алматы әлемдік цирк өнерінің астанасына айналады. Қала әкімдігінің қолдауымен 2026 жылғы 22-26 шілде аралығында Қазақ мемлекеттік циркінде IV Халықаралық цирк өнері фестивалі ALMATY CIRCUS FESTIVAL өтеді, деп хабарлайды Almaty.news ақпарат агенттігі.
Бес күн бойы манежде әлемнің 20 елі мен аймағынан келген үздік артистер кездеседі. Алматыға Вьетнам, Қытай, Германия, Франция, Италия, Швейцария, Венгрия, Түркия, Моңғолия, Өзбекстан, Тәжікстан, Беларусь, Ресей, Қазақстан, Украина, Армения, Саха (Якутия) Республикасы, Эфиопия, Түрікменстан өкілдері қазіргі заманғы цирк өнерінің ең тамаша нөмірлерін көрсету үшін келеді.
Фестиваль қонақтарын әуе гимнастикасы, акробатика, эквилибристика, жонглёрлік, клоунада, оригиналды жанр және жануарлар дрессурасы күтеді.
Фестивальдің нағыз көркі — әлемге әйгілі клоун Андрей Жигаловтың (Германия) өнері. Ол ірі халықаралық цирк фестивальдерінің ең жоғары наградаларының иегері және қазіргі заманның ең көрнекті клоундарының бірі.
Байқау бағдарламасы аяқталғаннан кейін цирк мерекесі жалғасады: тамыз айында көрермендер фестиваль жеңімпаздары мен лауреаттарының қатысуымен арнайы шоу көре алады, ол 23 тамызға дейін созылады.
IV халықаралық цирк өнері фестивалі ALMATY CIRCUS FESTIVAL — бұл әлемдік премьералар, керемет эмоциялар және бүкіл отбасы үшін нағыз сиқыр. Фестиваль жаздың жарқын мәдени оқиғаларының біріне айналып, іс-шаралық туризмді дамытуға және Алматының халықаралық мәдениет пен өнер орталығы ретіндегі мәртебесін нығайтуға ықпал етеді.
Билеттер сатылымда — Ticketon сайтында және Қазақ мемлекеттік циркінің кассасында.
Дереккөз: Almaty.tv