Алматыда соңғы аптада аномальды ыстық сақталуда. Жазғы аптаптың мегаполистегі ауа сапасына әсері туралы қалалық экология департаментінің басшысы Дінмұхамед Лесбеков айтып берді, деп хабарлайды Almaty.news ақпарат агенттігі.
Оның сөзінше, ауаны ластаушы негізгі көз жойылған жоқ.
— Негізінен ластанудың шыңы жылыту маусымына келеді. Жазда жылыту жоқ. Бірақ атмосфералық ауаның негізгі ластаушысы көлік болып қалады — оның үлесіне шамамен 60 пайыз шығарынды келеді. Өкінішке қарай, ескі көлік паркі жазда да, жылыту маусымында да атмосфералық ауаның тазалығын толық қамтамасыз етуге мүмкіндік бермейді, — деп түсіндірді Дінмұхамед Лесбеков.
Ол қаладағы ауа жағдайын бақылаумен «Қазгидромет» РМК айналысатынын қосты. Синоптиктердің балансында Алматыда ауа сапасын бақылаудың 20 автоматтандырылған жүйесі және бес қолмен басқарылатын стационарлық бекет бар.
Спикердің айтуынша, жазғы уақытта — тіпті экстремалды ыстық кезеңдерінде де — бұл бекеттер әдетте қыста байқалатын шамадан тыс, шыңдық ластануды тіркемейді.
Бұған дейін қоғамдық денсаулық сақтау басқармасы Алматыда аномальды ыстық аясында жедел медициналық көмекке жүгінушілер санының өскенін хабарлаған еді.
Дереккөз: Inform.kz