Мемлекет басшысына академияның 180 адамға арналған жатақханасы көрсетілді. Қазір мұнда еліміздің әр өңірінен келген 116 бала тұрып, жаттығады, деп хабарлайды Almaty.news ақпарат агенттігі.
Академияға ойыншыларды іріктеуді испандық бапкерлер жүргізді, бұған Қазақстанның түкпір-түкпірінен 4 мыңнан астам бала қатысты. Жас футболшыларға оқу, жаттығу және өздігінен дайындалу үшін барлық жағдай жасалған.
Қасым-Жомарт Тоқаевқа академияны дамыту және спорт инфрақұрылымын кеңейту жоспарларын таныстырды. Жасанды көгалдары бар екі ашық футбол алаңын, 500 орындық жабық манеж және жаңа әкімшілік-тұрмыстық кешен ғимаратын салу жоспарланған.
Президентке академияның орналасқан жері төзімділікке жаттығуға қолайлы, климаттық факторлар ескеріліп таңдалғанын хабарлады. Алматы облысы Талғар ауданының таза тау ауасы мен қолайлы климаты балалар ағзасының тез қалпына келуіне ықпал ететіні атап өтілді.
Содан кейін Қасым-Жомарт Тоқаев ФИФА стандарттарына сай жабыны бар футбол алаңын аралады. Осы кезде алаңда жас футболшылар испандық әдістеме бойынша доппен жұмыс істеу техникасы мен командалық өзара әрекетті жаттықтырды.
Іс-шараға Қазақстандағы Испания елшісі Луис Франсиско Мартинес Монтес, «Атлетико Мадрид» футбол клубының директорлар кеңесінің мүшесі Давид Вилья және «Атлетико Мадрид» футбол клубы академиясы мен халықаралық даму ісі жөніндегі директордың орынбасары Мария Тереса Кириви қатысты.
Бұған дейін Тоқаев Алатау қаласын дамыту жөніндегі кеңес өткізді. Ол Alatau City толығымен цифрлы қалаға айналатынын мәлімдеді. Сондай-ақ Алматы облысындағы жер мәселелерін шұғыл шешуді тапсырды, деп хабарлайды Almaty.news ақпарат агенттігі.
Дереккөз: Zakon.kz