Алматының Наурызбай ауданында 240 орынға есептелген жаңа балабақшаның құрылысы аяқталды. Заманауи нысан Қарағайлы өзенінің батыс жағында орналасқан және жақын арада қала коммуналдық меншігіне беріледі, деп хабарлайды Almaty.news ақпарат агенттігі.
Екі қабатты ғимарат 10 топқа есептелген. Мектепке дейінгі мекеменің ашылуы аудандағы жұмыс істеп тұрған балабақшаларға жүктемені азайтуға мүмкіндік береді. Сонымен қатар 40-тан астам тұрақты жұмыс орны құрылады.
Балабақшада балалардың жайлы болуы мен жан-жақты дамуы үшін барлық жағдай жасалған. Негізгі білім беру бағдарламасынан бөлек, тәрбиеленушілерге гимнастика, музыка және би үйірмелері ұйымдастырылады.
Қауіпсіздік мәселелеріне ерекше көңіл бөлінген. Инженерлік жүйелер мен техникалық жабдықтар балалар аймағынан оқшауланған жеке жертөле бөлмесінде орналасқан. Кіреберіс топта мүмкіндігі шектеулі азаматтар үшін де жағдай жасалған.
Жобалау кезінде қауіпсіздік, практикалық және балаларға қолайлы орта құруға ерекше мән берілді. Қазіргі уақытта нысанды қала коммуналдық меншігіне беру үшін қажетті құжаттар рәсімделуде. Рәсімдер аяқталғаннан кейін балабақша алғашқы тәрбиеленушілерін қабылдайды, — деп атап өтті Алматы құрылыс басқармасында.
Дереккөз: Almaty.tv