Алматыда 10-шы джиу-джитсудан Азия чемпионаты басталды. 27 елдің спортшылары әртүрлі жас санаттары мен пәндер бойынша медальдарды сарапқа салады, деп хабарлайды Almaty.news ақпарат агенттігі.
Жарысқа 27 елден мыңға жуық үздік спортшы қатысады, оның ішінде Таиланд, Сауд Арабиясы және Қытай делегациялары бар. Чемпионат бірнеше күнге созылып, жасөспірімдер, юниорлар, ересектер және пара-джиу-джитсу өкілдері арасында өтеді. Алғашқы күні 16 жасқа дейінгі ұлдар мен қыздар арасында белдесулер өтті, кейін Duo Classic және Duo Show пәндері бойынша өнер көрсету жоспарланған.
«Бұл чемпионаттың маңызы өте зор. Ең алдымен, ол Азия ойындары қарсаңында өтіп жатыр. Барлық елдер өздерінің үздік спортшыларын әкелді, рейтингтерін көтеру, дайындық деңгейін тексеру және Азия ойындарына қаншалықты дайын екенін түсіну үшін. Бұл күшті қарсыластармен күресте өз күшін бағалауға тамаша мүмкіндік», — деп атап өтті ҚР джиу-джитсу қауымдастығының президенті Қуат Сағиев.
Чемпионаттың ерекшелігі – жарыстар Азия елдері үшін тікелей эфирде көрсетіледі. Осының арқасында миллиондаған көрермен континенттің үздік спортшыларының белдесулерін нақты уақытта бақылай алады.
«Мен бұл турнирге өте мұқият дайындалдым, оған өту үшін Қазақстан чемпионатын жеңуім керек болды. Қазақстан чемпионатында бірінші орын алдым, содан кейін осы турнирге үлкен дайындықтан өттім – күніне бірнеше рет жаттықтым», — деді чемпионат қатысушысы Айханым Рахметова.
«Мен джиу-джитсудан Азия чемпионатына екінші рет қатысып отырмын. Өз елімде жақсы дайындалдым деп ойлаймын. Осы турнирге толық дайынмын», — деді Сауд Арабиясынан келген қатысушы Сұлтан Малас.
Чемпионат 19 шілдеге дейін жалғасады. Ұйымдастырушылардың айтуынша, оны өткізу елде джиу-джитсуды дамытуға жаңа серпін береді.
Дереккөз: Almaty.tv