12 мамырда Алматыдағы «Алматыгенплан» ҒЗИ алаңында Қазақстанның ірі туристік инфрақұрылымдық жобалары – Алматы тау кластері мен «Almaty Superski» жобасының даму перспективаларына арналған кеңес өтті. Ұйымдастырушы – «Атамекен» Қазақстан Республикасы Ұлттық кәсіпкерлер палатасы, деп хабарлайды Almaty.news ақпарат агенттігі.
Талқылауға «Атамекен» ҰКП Төралқа төрағасы Қанат Шарлапаев, Алматы қаласы әкімінің орынбасары Нұрлан Абдрахим, Kazakh Tourism Development бас атқарушы директоры Ержан Еркінбаев, туризм вице-министрі Бауыржан Рапиков, экоминистрлік комитетінің төрағасы Данияр Тұрғамбаев, өңірлік және салалық кеңестердің, салалық қауымдастықтардың, бизнес-қоғамдастықтың өкілдері, сондай-ақ сарапшылар мен жоба әзірлеушілер қатысты.
«Атамекен» ҰКП Төралқа төрағасы Қанат Шарлапаев тау кластерін дамытудың жүйелі тәсілінің маңыздылығын атап, оның ел экономикасы мен туризм саласының ұзақ мерзімді өсуі үшін стратегиялық мәнін ерекше атады:
«Алматы тау кластерін дамыту – бұл жай ғана инфрақұрылымдық жобалар емес, туризмнің, бизнестің және жұмыспен қамтудың тұрақты өсуін қамтамасыз ете алатын жаңа экономикалық модельді қалыптастыру. Алматының Орталық Азиядағы кәсіпкерліктің басты орталығы және туристер үшін негізгі магнит ретіндегі мәртебесін нығайту қажет».
Кеңес барысында Алматы қаласы Туризм басқармасының басшысы Галия Токсеитова Алматы тау кластерін дамыту тұжырымдамасын таныстырды. Ол бірыңғай өзара байланысты инфрақұрылымды қалыптастыруды, жыл бойы туристік ұсынысты дамытуды, қызмет көрсету мен қауіпсіздік деңгейін арттыруды және әртүрлі рекреациялық аймақтарды бірыңғай жүйеге біріктіруді көздейді.
Талқылаудың негізгі элементтерінің бірі – «Almaty Superski» жобасы. Ол халықаралық деңгейдегі заманауи жыл бойы жұмыс істейтін туристік инфрақұрылымды құруға және Алматыны Орталық Азияның тау туризмі орталығы ретінде дамытуға бағытталған.
Ұсынылған материалдарға сәйкес, жоба 1022 гектар аумақта инфрақұрылымды дамытуды, 17 көтергіш, әртүрлі қиындық деңгейіндегі 60 шақырымнан астам трасса салуды, сондай-ақ ауданы 20 гектар заманауи тау ауылын құруды көздейді. Алматы тау кластерін дамытудың жалпы тұжырымдамасы 30-ға дейін канатты жол салуды, жалпы ұзындығы 151 шақырым шаңғы трассаларын дамытуды және өткізу қабілетін тәулігіне 30 мың адамға дейін арттыруды қамтиды.
Жоба жыл бойы инфрақұрылымды пайдалануға бағытталған. Қысқы туризмнен басқа, хайкинг маршруттары, веложолдар, маунтинбайк инфрақұрылымы, заманауи визит-орталықтар және таулардағы бірыңғай қауіпсіздік контурын құру қарастырылған.
Әзірлеушілер экологиялық тұрақтылық мәселелеріне ерекше назар аударды. Жобаны дайындау кезінде экология, гидрология, зоология, топырақтану және тұрақты табиғат пайдалану саласындағы профильді ғылыми институттармен және сарапшылармен жүйелі жұмыс жүргізіліп жатыр. Ұсынылған тәсілдер туристік ағындарды басқаруды, ұйымдасқан инфрақұрылымды дамытуды және тау экожүйесіне антропогендік жүктемені азайтуды көздейді.
Kazakh Tourism Development бас атқарушы директоры Ержан Еркінбаев атап өтті:
«Almaty Superski – бұл Алматы туризмін дамудың жаңа деңгейіне шығаруға тиіс стратегиялық жоба. Біз жай ғана тау курортын салу туралы емес, халықаралық деңгейдегі заманауи жыл бойы жұмыс істейтін туристік экожүйені құру туралы айтып отырмыз. Қазақстан үшін бұл – үлкен мүмкіндік».
Дереккөз: Almaty.tv