Алматы тұрғыны қалалық кафелердің біріне тапсырыс берген самсадан ветеринарлық чип тауып, әлеуметтік желіде шағымданған. Алайда ДСЭК мамандары бұл жағдайда тексеру жүргізу мүмкін емес екенін айтты, деп хабарлайды Almaty.news ақпарат агенттігі.
ДСЭК Алматы басшысының орынбасары Гауһар Каткенова брифингте журналистерге кафеде тексеру неліктен жүргізілмегенін түсіндірді. Оның айтуынша, шағым авторы санитарлық-эпидемиологиялық бақылау органдарына, соның ішінде аудандық басқарма мен Департаментке ресми түрде жүгінбеген. Ал әлеуметтік желідегі жарияланым жоспардан тыс тексеру тіркеуге негіз бола алмайды, өйткені барлық тексерулер Кәсіпкерлік кодексі аясында жүргізіледі.
«Біз жарияланымды көрдік. Алайда оның авторы қалалық санитарлық-эпидемиологиялық бақылау органдарына, оның ішінде аудандық басқарма мен Департаментке жүгінбеген. Жарияланым жоспардан тыс тексеруді тіркеуге негіз болмайды, сондықтан барлық тексерулер Кәсіпкерлік кодексі аясында жүргізіледі. Біз автордан eOtinish арқылы аудандық басқармаға чекті қоса отырып жүгінуін сұраймыз, бұл сенімді негіз және растайтын факт болады. Өйткені жеке және заңды тұлғалардың өтініштері бойынша жоспардан тыс тексеру сенімді негіздер мен растайтын фактілер болған кезде тіркеледі. Бұл жағдайда фото, видео тексеру тағайындауға негіз бола алады, сондай-ақ осы өнімді сатып алу чегі де», — деді Гауһар Каткенова.
Кафе өз Instagram парақшасында чип ірі қара мал етінен кездейсоқ табылғанын мәлімдеп, видео жариялаған. Ал қазір тұрғынның шағымы өшірілген. ДСЭК өкілі бұған дейін де Алматы қоғамдық тамақтану орындарында ит еті қолданылады деген шағымдар түскенін, бірақ тексеру барысында бұл расталмағанын айтты.
«Бұрын ДСЭК Алматы мен Санитарлық-эпидемиологиялық бақылау комитетіне қоғамдық тамақтану орындарында ит еті қолданылады деген өтініштер түскен. Осы өтініштер аясында біз бірқатар нысанды тексердік, бірақ растау фактілері анықталмады. Сондықтан тексерусіз бұл чиптің тағамға қалай түскенін түсіндіре алмаймын. Зертханада өнімнің ДНҚ сәйкестігі бойынша зерттеулер жүргізіледі. Бұл біз өткен жылдары өнім сынамаларын іріктеп жүргізген тексерулер. Бірақ ит немесе мысық ДНҚ-сы зерттеу кезінде анықталған жоқ», — деп түйіндеді ол.
Дереккөз: Nur.kz