Алматыдағы Наурызбай ауданында тұрғындардың шағымынан кейін жүргізілген ауа сапасын тексеру қорытындысы бойынша бірқатар көрсеткіш бойынша нормадан асу тіркелді, деп хабарлайды Almaty.news ақпарат агенттігі.
«Eco Almaty» ЖШС мәліметінше, азот диоксидінің концентрациясы норма 0,2 мг/м³ болғанда 4,410 мг/м³, бензол — норма 0,3 мг/м³ болғанда 5,749 мг/м³, ал шаң (қалқымалы заттар) — норма 0,5 мг/м³ болғанда 36,949 мг/м³ құрады.
Ауа сапасын тексеру Наурызбай ауданы тұрғындарының ауа сапасының нашарлауы, өткір иістер және тұрмыс жағдайына кері әсері туралы шағымдарынан кейін жүргізілді. Тұрғындармен кездесу 13 мамырда «Eco Almaty» ЖШС, экология департаменті, Наурызбай ауданы әкімдігі және санитарлық-эпидемиологиялық бақылау департаменті өкілдерінің қатысуымен өтті.
Тексеру барысында мамандар көміртегі тотығы (CO), азот диоксиді (NO₂), күкірт диоксиді (SO₂), күйе, қорғасын, қалқымалы заттар, формальдегид, күкіртсутек, бензол және көмірсутектердің мөлшерін анықтады.
Жиналған материалдар қолданыстағы заңнама аясында қарау және шара қабылдау үшін уәкілетті органдарға жіберілді.
Дереккөз: Almaty.tv