Медеу ауданындағы кафелердің бірінде болған өрттің себебі — бөлме ішінде қолданылған пиротехникалық шамдар, деп хабарлайды Almaty.news ақпарат агенттігі.
2026 жылғы 29 сәуірде Алматыдағы Достық даңғылында орналасқан «Friendly» кафесінде өрт шықты. Оқиға әлеуметтік желілерді мониторингтеу барысында анықталды. Тексеру барысында түнгі уақытта мекемеде туған күнді тойлау өткені белгілі болды. Тортты безендіру үшін шам-феерверктер қолданылып, олардың жылу әсерінен интерьердің сәндік элементтері тұтанған.
Оқиға бойынша мекеме иесіне қатысты екі әкімшілік іс қозғалды. Бұзушылықтар бөлме ішінде пиротехникалық бұйымдарды қолданумен, сондай-ақ өрт туралы өртке қарсы қызметке хабарламаумен байланысты. Қолданыстағы заңнамаға сәйкес, әрбір анықталған факті бойынша 15 АЕК мөлшерінде айыппұл қарастырылған.
Дереккөз: Inalmaty.kz