Төтенше жағдайлар министрлігінің бөлімшелері сел қауіпті учаскелерде тәулік бойы бақылауды жалғастыруда. Алматыдағы гидрологиялық жағдай тұрақты болып қалуда. Өзендердегі су деңгейінің көтерілуі байқалмайды, деп хабарлайды Almaty.news ақпарат агенттігі Kazinform-ға сілтеме жасап.
Алдын алу шаралары аясында ТЖМ және жергілікті атқарушы органдардың күшімен Ақсай өзенінің арнасын нығайту және тазарту жұмыстары аяқталды. Жүргізілген шаралардың арқасында су деңгейі айтарлықтай төмендеді.
Бүгін мореналық көлдер мен өзен бассейндерін аэровизуалды зерттеу жоспарланған. Сонымен қатар ТЖМ қызметкерлері Үлкен Алматы және Кіші Алматы өзендерінің бассейндерін үздіксіз бақылап отыр.
Жағдайды бақылау бекеттерінде Алматы қаласы ТЖД, Құтқару қызметі, «Барыс» Республикалық жедел-құтқару жасағы, ТЖМ «Қазселденқорғау» және Полиция департаментінің 130-дан астам жеке құрамы мен 20 техникасы жұмылдырылған.
Жағдай ТЖМ-нің тұрақты бақылауында.
Бұған дейін Түрген шатқалындағы нөсерден киіз үйлер мен саяжай учаскелері су астында қалып, 58 адам эвакуацияланған болатын.
Кеше Алматы облысының Еңбекшіқазақ ауданында қатты жауын-шашын салдарынан Түрген өзенінде су деңгейі көтерілді.
Алматы тұрғындары сел қаупіне байланысты ішінара эвакуацияланды.
Дереккөз: Inform.kz