Алматыда газ құбырын ауыстыруға байланысты Жароков көшесі мен әл-Фараби даңғылының бойында көлік қозғалысына ішінара шектеу енгізіледі, деп хабарлайды Almaty.news ақпарат агенттігі.
Алмалы ауданында жаңғырту ұзындығы 1861 метр болатын учаскені қамтиды – Қарасай батыр көшесінен Жароков көшесінің шығыс жағымен Мынбаев көшесіне дейін. 1974 жылдан бері пайдаланылып келе жатқан диаметрі 426 мм ескі газ құбыры диаметрі 530 мм жаңа құбырға ауыстырылады, бұл жүйенің өткізу қабілетін арттырып, қаланың орталық және жоғарғы бөліктеріне газды тұрақты жеткізуді қамтамасыз етеді.
«Құрылыс-монтаж жұмыстарын жүргізуге байланысты Жароков көшесінің жекелеген учаскелерінде автокөлік қозғалысына ішінара шектеу енгізіледі», – деп хабарлады «QazaqQaz Aimaq» АҚ баспасөз қызметі.
Сондай-ақ реконструкция Медеу және Бостандық аудандарында жүргізіледі. Жаңғырту ұзындығы 1154 метр болатын учаскені қамтиды – Луганский көшесінен әл-Фараби даңғылының солтүстік жағымен Қаратаев көшесіне дейін. Мамандар 1974 жылы салынған диаметрі 426 мм ескі газ құбырын диаметрі 720 мм ұлғайтылған жаңа құбырларға ауыстырады. Жұмыстар жолдың төрт учаскесінде бір уақытта басталады: Falcon City тұрғын үй кешенінің алдында (335 п. м); «Ритц-Палас» сауда-ойын-сауық орталығының қарсысында (471 п. м); Мендекулов көшесі мен Назарбаев даңғылы арасында (166 п. м); Померанцев көшесі мен Қаратаев көшесі арасында (162 п. м).
Дереккөз: Zakon.kz