Алматыда коммуналдық қызметтер нөсер жаңбырдың салдарын жоюмен айналысуда, деп хабарлайды Almaty.news ақпарат агенттігі.
4 шілде күні Алматыда 10 мм жауын-шашын түсті, ең қарқынды жаңбыр сағат 15:00-ден 16:00-ге дейін байқалып, 7 мм жауын-шашын түсті. Жалпы, найзағайлы жаңбыр сағат 14:00-ден 17:00-ге дейін жалғасты.
Қаланың коммуналдық инфрақұрылым және тұрғын үй инспекциясы басқармасының хабарлауынша, жергілікті су басу орындарына жедел ден қою үшін коммуналдық қызметтердің күшейтілген кезекшілігі ұйымдастырылды. Жұмысқа 104 бірлік арнайы техника, 74 мотопомпа, 12 ассенизаторлық машина, 75 жедел бригада жұмылдырылды, олардың құрамына 425 жол жұмысшысы кірді. Сонымен қатар, 2,3 мың құм салынған қап дайындалды. Қосымша қалалық Құтқару қызметі мен ТЖД бөлімшелері кезекшілік атқарды.
Күн ішінде қала аумағында 26 жергілікті су басу учаскесі тіркелді. Сағат 20:00-дегі жағдай бойынша коммуналдық қызметтер 24 учаскедегі су басуды толығымен жойды, тағы екі учаскеде жұмыс жалғасуда.
Тәулік бойы көше-жол желісін күтіп ұстауға 3 080 жол жұмысшысы мен 1 225 бірлік арнайы техника жұмылдырылды.
Синоптиктердің болжамы бойынша, 5 және 6 шілдеде Алматыда жауын-шашынсыз айнымалы бұлттылық күтіледі. Коммуналдық қызметтер қалыпты режимде жұмысын жалғастыруда.
Бұған дейін құтқарушылар алматылықтарға тауға барудан бас тартуға кеңес берген болатын. 4-5 шілде аралығындағы қатты жауын-шашын болжамына байланысты таулы жерлерде сел қаупі сақталады.
Дереккөз: Inform.kz