Алматыда қорғаныс саласында қолданылуы мүмкін шешімдерді ұсынған 100-ден астам өтініштің ішінен 14 команда финалға шығып, үздік жобалар анықталды, деп хабарлайды Almaty.news ақпарат агенттігі.
Конкурс 5 қарашада Defense Tech Hub алаңында өтті. Жүлде қоры 2 млн теңгені құрады. Қатысушылар ұшқышсыз жүйелер, жасанды интеллект, инфрақұрылымды қорғау және мамандар даярлау салаларындағы әзірлемелерін таныстырды.
Бірінші орынды ауа қауіптерінен аса маңызды инфрақұрылым нысандарын қорғау үшін ұшқышсыз ұшу аппараттарын автономды басқару модульдерін әзірлеген команда иеленді.
Екінші орын ұшқышсыз ұшу аппараттары операторларын даярлауға арналған виртуалды тренажер ұсынған командаға берілді.
Үшінші орынды зымыран жүйелерін әзірлеу, өндіру және сынау үшін отандық технологиялық база құру жобасымен команда иеленді.
Ақшалай жүлделерден бөлек, жеңімпаздар Almaty FabLab зертханасына қолжетімділік алды, ал үшінші орын алған команда Defense Tech Hub-та алты айға екі жұмыс орнын иеленді.
Конкурс әзірлеушілерге ұсынылған технологиялардың практикалық қолданылуы және оларды одан әрі сынау шарттары туралы сала мамандарымен пікірлесуге мүмкіндік берді, деп атап өтті «Қазақстан ГИС Орталығы» АҚ басқарушы директоры, DefenseTech кураторы Нұркен Ержанов.
Конкурстық баяндамалардан бөлек, технологиялық әзірлемелер көрмесі ұйымдастырылды. Келушілерге аумақтарды патрульдеуге арналған автономды ұшқышсыз ұшу аппараттары, жасанды интеллект қолданылған дрон-қарсыластар, компьютерлік көру жүйелері, ұшқышсыз ұшу аппараттарына қарсы әрекет ету тренажерлері және роботтандырылған платформалар көрсетілді.