Алматының Бостандық ауданында полицейлер көшеде пышақпен жүрген ер адамды ұстады, деп хабарлайды Almaty.news ақпарат агенттігі.
Бұған дейін әлеуметтік желілерде ер адам туралы ақпарат тараған еді. Жарияланым авторының айтуынша, ол есепте тұрған көрінеді және көшеде пышақпен жүріп, аудан тұрғындарына қауіп төндіреді.
— Бүлінген мүлік үшін оған ештеңе істемейді, бәрін өз қаражатымызға қалпына келтіреміз. Ол қақпаларды, көліктерді бұзады, дөңгелектерді кеседі. Оның қорғаншысы жоқ, өйткені анасы бірнеше жыл бұрын өте оғаш жағдайда хабар-ошарсыз кеткен. Ол қыста жылытусыз, қалыпты күтімсіз тұрады. Мемлекеттік органдарды белгілеңіздерші, назар аударсын. Бейнежазбада ол жол жөндеп жатқан балаларға шабуыл жасады. Пышақты бірден көрмедік, өйткені ол оны қалтасында жасырады, — деді Алматының Бостандық ауданының тұрғыны әлеуметтік желіде.
Алматы полиция департаментінің баспасөз қызметінен 30 тамызда «102» пультіне көшеде пышақпен жүрген ер адам туралы хабарлама түскенін мәлімдеді. Оқиға орнына дереу полиция экипажы жіберілді.
— Келген қызметкерлер ақпаратты растап, азаматтардың қауіпсіздігін қамтамасыз етті. Ер адам ұсталып, жедел жәрдем бригадасына тапсырылды. Оның психикалық денсаулық орталығында есепте тұрғаны анықталды, кейін ол мамандандырылған медициналық мекемеге жатқызылды, — деді Алматы полиция департаментінің баспасөз қызметі.
Бостандық ауданының полиция басқармасы факті бойынша тексеру жүргізді. Полиция қазіргі уақытта қоршаған ортаға қауіп жоқ екенін жеткізіп, азаматтарды сабыр сақтауға және тексерілмеген ақпаратты таратпауға шақырды.
Бұған дейін Ақмола облысында жүргізуші жол апатының екінші қатысушысына бұрағышпен шабуыл жасаған болатын. Полицейлер ЖКО-ға қатысушылардың біріне қатысты екі қылмыстық іс қозғады.