Алматыда теміржол өткелінде локомотив КамАЗ-бен соқтығысты. Жүк көлігінің жүргізушісі жарақат алып, ауруханаға жатқызылды, деп хабарлайды Almaty.news ақпарат агенттігі.
Оқиға Алматының Түрксіб ауданында болды. Алдын ала мәлімет бойынша, КамАЗ жүргізушісі маневр жасау кезінде теміржол өткеліне шығып кеткен, сонда жүк көлігі тоғыз вагоннан тұратын құраммен келе жатқан локомотивпен соқтығысқан.
«Апат салдарынан КамАЗ жүргізушісі жарақат алып, медициналық мекемеге жеткізілді. Жүк көлігі ауыр механикалық зақым алды», — делінген хабарламада.
Оқиға фактісі Түрксіб ауданы полиция басқармасында тіркелген.
«Оқиға орнында полиция қызметкерлері жұмыс істеді, қарау жүргізіліп, апат схемасы жасалды. Оқиғаның барлық мән-жайы анықталуда», — деп хабарлады полициядан.
Ведомство теміржол өткелдері қауіптілігі жоғары аймақтарға жататынын еске салды.
«Теміржол өткелі — қауіптілігі жоғары аймақ, мұнда бір қателіктің бағасы тым жоғары болуы мүмкін. Жүргізушілер теміржол жолдарынан өту ережелерін қатаң сақтап, өткелдерді кесіп өткенде барынша мұқият болуы керек», — деп атап өтті полицияда.
Дереккөз: Nur.kz