Алматының Түрксіб ауданында патрульдік полиция қызметкерлерінен жасырынбақ болған 26 жастағы ер адам ұсталды, деп хабарлайды Almaty.news ақпарат агенттігі.
Оқиға Үлкен Алматы каналының бойындағы скверде болған. «Бұран-811» патрульдік полиция экипажы қызмет барысында бейтаныс адамның қылығына көңіл аударған. Ер адам қашып кетпек болған, алайда ұзаққа бармай, жедел түрде ұсталып, қамауға алынған.
Қашу кезінде ол күдікті затты лақтырып тастаған. Зат айғақ ретінде алынып, сот-химиялық сараптамаға жіберілді.
«Түрксіб ауданында «Бұран-811» патрульдік полиция экипажы Үлкен Алматы каналының бойындағы скверде қызмет атқарды. Бейтаныс адамның қылығы тәртіп сақшыларының назарын аударды. Ер адам жасырынбақ болды, бірақ ұзаққа қашып кете алмады — оны жедел түрде бұғаттап, ұстады. Қашу барысында ол құтылған зат қосымша сұрақтар тудырды», — делінген хабарламада.
Алдын ала мәлімет бойынша, заттың ішінде майлы күйдегі субстанция болған, оны ұсталған адам каннабис майы деп атаған. Алайда оның құрамын сарапшылар әлі анықтауы керек.
Алматы полиция департаментінің мәліметінше, оқиға орнына Түрксіб ауданы полиция басқармасының тергеу-жедел тобы келген.
«Зат белгіленген процессуалдық тәртіппен алынып, сот-химиялық сараптамаға жіберілді. Ұсталған адам 26 жаста. Ол — Алматы облысының тұрғыны, өз сөзіне қарағанда, құрылыста уақытша жұмыс істейді. Заттың шығу тегі, құрамы және оның тыйым салынған заттарға қатысы сараптама барысында анықталады», — деп қосты полицияда.