ҚР Ұлттық статистика бюросының дерегінше, сәуірде жайлы тұрғын үйді жалдаудың орташа құны шаршы метріне 5 000 теңгені құрады. Бұл өткен жылмен салыстырғанда 11,7%-ға жоғары. Алайда жылдық көрсеткіштер бұрынғы кезеңдердегі баға секірістерін көрсетсе, қазіргі нарықтағы жағдай әлдеқайда ұстамды, деп хабарлайды Almaty.news ақпарат агенттігі.
Айлық динамика бойынша сәуірде Қазақстан бойынша нарық наурызға қарағанда небәрі 0,2%-ға өсті. Бірнеше жыл қатарынан тез қымбаттаған сектор үшін бұл көрсеткіш тұрақтануға көшкенін білдіреді.
Нарықтың басты индикаторы – Алматы. Мұнда еліміздегі жалдаудың ең ірі көлемі мен ең жоғары бағалары шоғырланған. Сәуірде қалада жалдау бағасы наурызға қарағанда 0,5%-ға төмендеді, бұл ақпаннан бері үшінші рет төмендеу. Оңтүстік астана үшін мұндай серия – сирек кездесетін құбылыс: соңғы жылдары бұл тек 2024 жылдың көктемінде бірнеше жер сілкінісінен кейін және 2022 жылдың соңында Ресейден релоканттар келген кезде ғана байқалды.
Дегенмен Алматы әлі де Қазақстанның ең қымбат қаласы болып қала береді: жалдамалы тұрғын үйдің шаршы метрі орта есеппен 5 824 теңге. Салыстыру үшін: Астанада орташа жалдау құны шаршы метріне 5 529 теңге, Қарағандыда – 4 875 теңге, Шымкентте – 4 429 теңге.
Астанада жағдай сабырлырақ. Ақпан-наурызда төмендегеннен кейін сәуірде жалдау бағасы алдыңғы аймен салыстырғанда 0,5%-ға өсті – нарық өсіп жатқаннан гөрі тұрақты көрінеді.
Алматы мен Астана фонында өңірлік көрсеткіштер әлдеқайда жоғары. Жалдау бағасының ең айтарлықтай жылдық өсімі Петропавл, Павлодар, Өскемен және Ақтөбеде тіркелген. Петропавлда жалдау бағасы бір жылда 44,1%-ға өскен, алайда айлық мәнде индекс 97,3 құрады. Бұл наурызбен салыстырғанда баға төмендегенін білдіреді.
Ұқсас жағдай басқа қалаларда да байқалады. Яғни жылдық көрсеткіштер әлі де жоғары көрінгенімен, көптеген қалаларда ағымдағы динамика нөлге жақын немесе теріс аймаққа ауысқан. Абсолютті бағаларда өңірлердегі жалдау ірі мегаполистерге қарағанда әлдеқайда төмен.
Бағаның баяулауы 2025 жылғы қарашамен салыстырғанда айқын көрінеді. Сол кезде Қазақстан бойынша орташа жалдау шаршы метріне 4 920 теңге болса, қазір 5 000 теңге. Яғни 5 ай ішінде нарық небәрі 1,6%-ға өскен. Алматы осы уақыт аралығында 5 777-ден 5 824 теңгеге дейін, Астана 5 499-дан 5 529 теңгеге дейін көтерілген. Іс жүзінде еліміздің ірі нарықтары соңғы айларда өсуді тоқтатты.
Айтарлықтай динамика тек жекелеген өңірлік орталықтарда сақталды. Мысалы, Петропавлда орташа жалдау 3 990-нан 4 609 теңгеге, Павлодарда 3 500-ден 3 819 теңгеге, Қарағандыда 4 638-ден 4 875 теңгеге өсті.
Елдің оңтүстігі әлі де нарықтың ең қолжетімді сегменті болып қала береді. Ең төмен бағалар Тараз бен Түркістанда сақталуда – шаршы метріне тиісінше 2 525 және 2 751 теңге. Алматымен айырмашылық 2 еседен асады.
Қорытындылай келе, Қазақстандағы жалдау нарығы тез қымбаттау кезеңінен толық шықты. Жоғары жылдық көрсеткіштер әлі сақталғанымен, айлық динамика бұрынғы жылдарға қарағанда айтарлықтай әлсіз.
Дереккөз: Zakon.kz