Әкім Дархан Сатыбалдының төрағалығымен оқушы орындары тапшылығын жою және білім беру инфрақұрылымын дамытудың кешенді жоспарын іске асыруға арналған жұмыс кеңесі өтті, деп хабарлайды Almaty.news ақпарат агенттігі.
2025–2026 оқу жылының қорытындысы бойынша Алматыдағы 360 мектепте 357 225 бала білім алды. Қазіргі уақытта оқушы орындарына қажеттілік 29 735 құрайды, ең өткір мәселе Әуезов, Алатау және Бостандық аудандарында байқалады. Жүктеменің өсуі мектеп жасындағы балалар санының көбеюіне және ішкі көші-қонға байланысты: өткен оқу жылында ғана Алматы мектептеріне елдің басқа өңірлерінен 17 847 оқушы ауысып келген, оның жартысына жуығы Алматы облысынан.
Кеңес барысында қолданыстағы тапшылықты біртіндеп азайтуға мүмкіндік беретін шаралар кешені қаралды. Жаңа оқу жылы басталғанға дейін қалада сегіз жаңа мектеп ашылады, оның ішінде «Келешек мектептері» ұлттық жобасының жеті нысаны және жергілікті бюджет есебінен салынған бір мектеп бар. Сонымен қатар, жұмыс істеп тұрған мектептерге үш қосымша ғимараттың құрылысы аяқталады. Бұл 12 200 жаңа оқушы орнын құруға мүмкіндік береді.
Кеңесте мектепке дейінгі білім беруді дамыту мәселесі де қаралды. Алматыда 1 098 балабақша жұмыс істейді, оларға 88 мыңнан астам бала барады. Жыл басынан бері 3 мыңға жуық орынға арналған 33 жаңа мектепке дейінгі мекеме ашылды. Жыл соңына дейін тағы 23 балабақша ашу жоспарлануда, бұл балаларды мектепке дейінгі біліммен қамтуды 96,6%-ға дейін арттырып, кезекті екі мың балаға дейін қысқартуға мүмкіндік береді.
Кеңесті қорытындылай келе, қала әкімі жаңа білім беру нысандарын уақтылы пайдалануға беруді, барлық жобалардың іске асырылуын бақылауды күшейтуді және қаланың қарқынды дамып келе жатқан аудандарында оқушы орындары тапшылығын кезең-кезеңімен жою үшін қосымша шаралар қабылдауды тапсырды.
Дереккөз: Almaty.tv