Алматыда кене шағудан зардап шеккендер саны артты. Жылы ауа райының ерте келуіне байланысты кенелердің белсенділігі ерте басталған, деп хабарлайды Almaty.news ақпарат агенттігі.
2026 жылы кенелердің маусымдық белсенділігі Алматыда ерте басталды. Алғашқы өтініштер наурыз айының басында тіркелген. Қала маңы кене энцефалиті мен боррелиозды тарататын иксодты кенелердің таралу аймағы болып қала береді.
Алматы қалалық санитарлық-эпидемиологиялық бақылау департаменті басшысының орынбасары Әсел Қалықованың айтуынша, кене шаққаннан кейін медициналық көмекке 2023 адам жүгінген. Бұл 2025 жылдың осы кезеңімен салыстырғанда 11%-ға көп. Зардап шеккендердің жартысына жуығы – 14 жасқа дейінгі балалар.
— 2026 жылы кене шағу жағдайлары алдыңғы маусыммен салыстырғанда ерте тіркеле бастады. Бұл ерте жылынумен және кенелердің ерте белсенділігімен байланысты. Өтініштер санының өсуіне қарамастан, жалпы жағдайлардың саны көпжылдық орташа көрсеткіштен аспайды. Жағдай тұрақты бақылауда, — деді Әсел Қалықова өңірлік коммуникациялар қызметінің брифингінде.
Маманның мәліметінше, қалада кене энцефалитінің екі жағдайы тіркелген, екі науқас та вакцинацияланбаған.
1 наурыздан бастап қалада кене инфекциялары мен ауруханаларға жүгінушілерге апта сайын мониторинг жүргізілуде. Зардап шеккендерге медициналық көмек көрсетіледі, қажет болған жағдайда науқасқа кенеге қарсы иммуноглобулин енгізіледі. Ол үшін қалада 7400 мл препарат қоры бар.
Мамандар ең тиімді алдын алу шарасы кене энцефалитіне қарсы вакцинация екенін еске салады. 18 мамырдағы жағдай бойынша кене энцефалитіне қарсы 2381 адам вакцинацияланған. Қалада бельгиялық «ТикоВак» вакцинасының 8000 дозадан астам қоры бар.
Бұған дейін Жетісуда кене шағу жағдайларының төрттен бірге өскені хабарланған.
Дереккөз: Inform.kz