Алматыда бірнеше ондаған ескі полиция көліктерін саудаға шығарды. Аукцион бағаны төмендету қағидаты бойынша өтеді, деп хабарлайды Almaty.news ақпарат агенттігі.
Лоттар электронды сауда алаңы порталында пайда болды. Сатылымға әртүрлі маркадағы 50-ден астам автокөлік қойылған. Көлік бағасы 1 991 550 теңгеден басталады — мысалы, халық арасында «Нива» деп танымал Lada-21214 автокөлігі осы тұрады. Жазуларға қарағанда, ол бұрын учаскелік қызметке тиесілі болған.
Көлік бағасы әртүрлі — Peugeot 301 бастапқы құны 2 126 940 теңге, 2 226 423 және 2 773 584 теңге. Ал Ssang Yong Actyon Sports 5 469 750 теңге, Kia Cerato — 8 167 785 теңге.
Сонымен қатар, 19 293 726 теңгеге полиция эвакуаторын табуға болады — бұл 2017 жылғы КАМАЗ.
Портал деректері бойынша, автокөліктер Алматы полиция департаментіне тиесілі, ал сатушы — Алматы қаласының мемлекеттік активтерді басқару басқармасы. Олардың көбі ішінара бөлшектелген — фаралары, бампері немесе басқа бөлшектері жоқ. Соққы салдары анық көрінетін зақымдалған көліктер де бар.