Алматыда түнгі уақытта екі жүк көлігінің соқтығысуы салдарынан жеке тұрғын үйге қауіп төнді, деп хабарлайды Almaty.news ақпарат агенттігі.
Howo жүргізушісінің айтуынша, ол Брянская көшесімен баяу жүріп келе жатқанда, жасыл желектерді суғарумен айналысқан ЗИЛ жүргізушісі Брянская көшесінен шыққан. ЗИЛ жолдың жүру бөлігіне бұрылған кезде Howo онымен соқтығысқан.
Соқтығыс кезінде Howo-ның оң алдыңғы дөңгелегі жарылып, жүк көлігі басқарудан айырылған. Соққының күші сондай, ЗИЛ-дің алдыңғы жүріс бөлігі жұлынып кеткен. Осыдан кейін көлік кішкентай тротуарға шығып кеткен.
Сол уақытта Howo да ЗИЛ-дің артынан тротуарға шығып, арықтардан өтіп, жолындағы бұталар мен ағаштарды құлатып, жеке тұрғын үйге қарай ұмтылған. Жүргізушінің жылдам әрекетінің арқасында көлік қоршаудың бір бөлігін және газ құбырларын ғана зақымдаған. Осыдан кейін Howo төмен қарай жүріп, аман-есен тоқтаған.
Осы жол-көлік оқиғасының салдарынан Howo жүргізушісі зардап шеккен. Оқиға орнына келген дәрігерлер оны ауруханаға жатқызған, бірақ ол ауыр жарақат алмағандықтан, апат орнына қайта оралған. ЗИЛ жүргізушісі де зардап шекпеген.
Дереккөз: Zakon.kz