Алматыдағы емханалардың бірінде босану кезінде әйел қайтыс болды, алайда медициналық мекеме бұл факті туралы Медициналық және фармацевтикалық бақылау комитетіне хабарламаған, деп хабарлайды Almaty.news ақпарат агенттігі.
Бұл туралы Алматы қаласы бойынша Медициналық және фармацевтикалық бақылау комитеті департаментінің басшысы Дәмір Дәулетбаев РСК брифингінде мәлімдеді.
«Өткен жылы бір ана өлімі тіркелді, биыл да бір жағдай анықталды. Бұйрыққа сәйкес, оқиға болған медициналық ұйым 24 сағат ішінде бізге, қалалық денсаулық сақтау басқармасына, әкімдікке және Денсаулық сақтау министрлігіне хабарлауы тиіс. Өкінішке қарай, барлық медициналық ұйым бұл бұйрықты уақтылы орындамайды. Жақында ана өлімі орын алды, біз бұйрықты орындамағаны үшін әкімшілік айыппұл салуға мәжбүр болдық», — деді Дәулетбаев.
Ол мұндай жағдайларда қандай шаралар қолданылатынын түсіндірді. Бұйрық бойынша ана өлімінің кез келген жағдайы тексерілуге жатады. Бұрын жоспардан тыс тексеру жүргізілетін. Сараптама нәтижелері күтілетін; Кәсіпкерлік кодексі бойынша шағын және орта бизнес субъектілері 10 жұмыс күні ішінде тексеріледі. Бұл аралық аз болды, жеткіліксіз еді.
Өткен жылы Денсаулық сақтау министрлігінің бұйрығына өзгерістер енгізіліп, тергеу ұғымы енгізілді, оған 30 күн бөлініп, тағы 30 күнге ұзартуға болады. Осыған сәйкес, оқиға тіркелген сәттен бастап біз мамандандырылған прокуратурада тексеруді тіркейміз де, құжаттарды тексере бастаймыз — медициналық құжаттамада өзгерістер болды ма, жазбалар сәйкес келе ме, және тағы басқа. Базада құжат айналымында өзгеріс болғаны немесе болмағаны тіркеледі», — деді спикер.
Оның айтуынша, құжаттар жиналады, тәуелсіз сарапшылар тартылады, сот-медициналық және патологиялық-анатомиялық сараптама жүргізіледі, ол бірнеше айға созылуы мүмкін. Содан кейін сараптама нәтижелері бойынша шешім шығарылады.
«Осыдан кейін Денсаулық сақтау министрлігінің штабында бұл жағдай қаралады. Бірақ оған дейін, егер стандарттардың бұзылуы, лицензияның болмауы немесе өрескел медициналық қателіктер анықталса, іс Ішкі істер министрлігіне беріледі», — деп толықтырды Дәулетбаев.
Дереккөз: Nur.kz