Алматы полициясы үйленген ер адамды қудалаған әйелге қатысты сталкинг бойынша қылмыстық іс қозғады. Бұл туралы қалалық ПД Қоғамдық қауіпсіздік басқармасы бастығының орынбасары Айтан Елеусізов брифингте мәлімдеді, деп хабарлайды Almaty.news ақпарат агенттігі.
«Бізде әйелдердің отбасылық-тұрмыстық қатынастар саласында құқық бұзушылық жасағаны туралы деректер болды. Оған дене жарақатын салу, ауыр дене жарақатын салу және сталкинг кіреді. Сталкинг бойынша әзірге бір ғана факт тіркелді, іс жүргізіліп жатыр. Оны қарым-қатынасты қайта жаңғыртқысы келгені итермелеген, бірақ екінші тарап – үйленген ер адам, сондықтан ол қазіргі некесін сақтау үшін полицияға жүгінген», – деді Елеусізов.
«Сталкерлер әдетте сотқа дейінгі тергеу сатысында-ақ құрбандарын қудалауды тоқтатады. Агрессивті тарап қудалауды, жанжалды доғарады, себебі алғаш ұсталған кезде оған заңның барлық нормалары түсіндіріледі. Ал егер сотқа дейінгі тергеу кезінде адам оны қудалауды тоқтатпаса, бұл сотта ауырлататын мән-жай ретінде ескерілуі мүмкін», – деп қосты ол.
Спикер сталкингті азаматтардың қауіпсіздігіне елеулі қатер ретінде қарастыратынын атап өтті. Қудалау үшін қылмыстық жауапкершілік енгізілгеннен кейін құқық қорғау органдары мұндай фактілерді анықтау және зардап шеккендерді қорғау жұмысын күшейткен.
«Сталкинг фактілері көбінесе тұрақты қоңыраулар, қорқытулар, бақылау, жүріс-тұрысты бақылау және психологиялық қысымнан басталады. Кейде қысым балалар немесе туыстар арқылы жасалады. Бұл әрекеттер кейін ауыр қылмысқа ұласуы мүмкін, сондықтан полицияның міндеті – тек жасалған құқық бұзушылықтарға әрекет ету емес, зорлық-зомбылықты ерте кезеңде алдын алу», – деп түйіндеді ол.
2026 жылғы сәуірдің қорытындысы бойынша профилактикалық есепке 3104 адам қойылды. 2557 құқық бұзушыға қатысты қорғау нұсқамалары шығарылды, тағы 547 адамға қатысты сот мінез-құлыққа арнайы талаптар белгіледі. Қорғау нұсқамаларын бұзғаны үшін 127 адам, ал арнайы талаптарды бұзғаны үшін 145 адам жауапкершілікке тартылды.
Дереккөз: Nur.kz