Алматыда атмосфералық ауаның жай-күйін бақылауды күшейту жоспарлануда. Қалалық мәслихат отырысында 20 мобильді экологиялық станция сатып алу мәселесі қаралды, деп хабарлайды Almaty.news ақпарат агенттігі қалалық әкімдіктің баспасөз қызметіне сілтеме жасап.
Жаңа құрылғылар мегаполистің әртүрлі аудандарында ауа сапасы туралы деректерді нақты уақыт режимінде алуға және ластану көздерін жедел анықтауға мүмкіндік береді деп күтілуде. Қазіргі уақытта қалада 16 стационарлық бақылау бекеті жұмыс істейді, алайда мамандардың пікірінше, олар аумақты толық қамту және жергілікті шығарындыларды дәл бақылау үшін жеткіліксіз.
Мобильді станциялар Алматының әртүрлі нүктелерінде жұмыс істей алады, бұл экологиялық жағдайдың нашарлау себептерін — көлік жүктемесін, өнеркәсіптік кәсіпорындардың қызметін немесе қатты отынды пайдалануды анықтауға мүмкіндік береді. Алынған деректерді экология, қоғамдық көлікті дамыту, газдандыру және шығарындыларды азайту саласындағы шешімдер қабылдау кезінде пайдалану жоспарлануда.
Дереккөз: Inalmaty.kz