Алматыда 1937 жылғы ескі ғимараттың орнына жаңа перзентхана бой көтеріп келеді. Нысан цокольді және үш жерүсті қабаттан тұрады, жалпы ауданы 12,4 мың шаршы метрден асады, деп хабарлайды Almaty.news ақпарат агенттігі.
Бұл туралы 2026 жылғы 7 қазанда қалалық әкімдіктің баспасөз қызметі мәлімдеді.
Ғимаратта босану және босанғаннан кейінгі бөлімшелер, әйелдер мен жаңа туған нәрестелерге арналған реанимация мен қарқынды терапия, диагностикалық және шала туған балаларды күтуге арналған мамандандырылған бөлмелер орналасады.
Нәрестелер үшін 22 кювез қарастырылған: 10-ы шала туған балаларды күтуге, тағы 12-сі реанимация және қарқынды терапия бөлімшесіне арналған. Сондай-ақ екі операциялық, сүт блогы және жаңа туған нәрестелерге арналған реанимациялық палата жабдықталады.
Қабылдау-диагностикалық бөлімшеде науқастар жағдайының ауырлығына қарай бөлінеді. Науқастар, стерильді материалдар, тағам өнімдері және медициналық қалдықтар үшін жеке маршруттар қарастырылған. Барлық кіреберістер қозғалысы шектеулі азаматтарға қолжетімді болады.
Жаңа перзентхананың жобалық қуаты 36 төсектен тұрады. Мекемеде 229 қызметкер жұмыс істейді.
Құрылыс-монтаж жұмыстарын 2027 жылы аяқтау жоспарланып отыр.