14 мамырда сағат 11:00-де Алматыда қалалық жоспарлы сейсможаттығу өтеді, ол халықты ескерту жүйесін іске қосумен бірге жүреді. Қалада сиреналар қосылып, теледидар, радио және мобильді хабарландырулар пайдаланылады, деп хабарлайды Almaty.news ақпарат агенттігі.
Қалалық ТЖД мәліметінше, жаттығуға дайындық алдын ала басталған — 12 мамырдан бастап теле- және радиоарналарда алдағы шара туралы еске салатын ақпараттық заставкалар мен сабыр сақтау ұсыныстары көрсетілуде.
Сейсможаттығу күні сағат 11:00-де қалалық ескерту жүйесі іске қосылады. Сирена-сөйлеу құрылғыларын іске қосу, теле- және радиоарналарды тоқтату, сондай-ақ мобильді қосымшалар арқылы хабарландырулар жіберу жоспарланған.
«Назар аударыңыздар!!!» дыбыстық сигналы ескерту болып табылады және төтенше жағдайлар қаупі немесе олар туындаған кезде шұғыл ақпаратты беру алдында халықтың назарын аудару үшін қолданылады.
Осы сигнал естілген жағдайда тұрғындарға теледидарлар мен радиоприемниктерді қосуға, сондай-ақ ресми интернет-ресурстар мен мобильді қосымшалардағы ақпаратты қадағалауға кеңес беріледі.
Дереккөз: Inalmaty.kz