Алматыда Қала күнін мерекелеу аясында «Almaty: Bala.Art – Мың бала» атты ауқымды балалар пленэрі өтті, оған 1000 жас суретші қатысты, деп хабарлайды Almaty.news ақпарат агенттігі.
Шығармашылық мерекенің басты оқиғасы ұлттық рекордты ресми тіркеу болды. «Almaty: Bala.Art – Мың бала» жобасы Қазақстанның рекордтар кітабына (КИнЭС) еліміздегі ең ауқымды балалар пленэрі ретінде енді.
Мың жас алматылық бір мезгілде туған қаласы туралы суреттер салды. Балалар өз жұмыстарында Алматыны тарихы мен танымал нышандары арқылы көрсетті — Ұлы Жібек жолы мен Алтын адам, ескі көшелер мен әйгілі апорт, тау шыңдары, субұрқақтар мен гүлзарлар, заманауи мегаполис және болашақтағы Алматы.
Тағы бір маңызды оқиға Алматының балалық шақ әнұранының тұсаукесері болды. Жаңа композицияны алғаш рет біріккен балалар хоры мен пленэр қатысушылары орындады.
Қала тұрғындары мен қонақтары үшін «С днем рождения, любимый Алматы!» атты мерекелік концерттік бағдарлама да өтті.
Алматы қаласы білім басқармасының жаңа мәдени-білім беру жобасы жай ғана ауқымды шығармашылық акция болып қалмады. Ол мың баланы сүйікті қала туралы өнер тілінде әңгімелеу деген ортақ идеяға біріктірді.
Іс-шараның финалында жас суретшілер «Almaty: Bala.Art – Мың бала» символикасы бар полотноны бірге жайды — бұл балалар шығармашылығының, бірліктің және туған Алматыға деген сүйіспеншіліктің символы.