Алматыда жастар арасында ысырапшылдыққа қарсы челлендж басталды. Бастама негізсіз шығындар, бедел үшін алынған несиелер, әлеуметтік желілердің әсері, сондай-ақ су, энергия, азық-түлік және басқа ресурстарды ұтымды пайдалану мәселелерін қамтиды, деп хабарлайды Almaty.news ақпарат агенттігі.
Кездесулер барысында қатысушылар күнделікті әдеттер мен олардың жеке әл-ауқатқа және жалпы қоғамға әсерін талқылап, пікір алмасып, тұтыну мен жауапкершілік мәселелеріне өз көзқарастарын қалыптастырады.
Қатысушылардың айтуынша, мұндай талқылаулар әдеттегі мінез-құлық үлгілерін қайта қарауға және шығындар мен тұтыну мәселелеріне жаңа қырынан қарауға көмектеседі.
Комьюнити орталықтарының белсенділері челлендж эстафетасын жоғары оқу орындары мен колледждерге тапсырды. Жоба Алматының оқу орындары мен жастар орталықтарының базасында жүзеге асырылып, қала жастарының кең ауқымын қамтиды.
Бастаманың негізгі идеясы – қазіргі жастардың көрсетілімді тұтыну мен ысырапшылдықтың орнына саналылықты, ұтымдылықты және жауапкершілікті таңдайтынын көрсету.
Дереккөз: Zakon.kz