Алматыда сел қауіпті кезеңде мореналық көлдердің жағдайын бақылау үшін биік таулы бекеттер орнатылды, деп хабарлайды Almaty.news ақпарат агенттігі.
Төтенше жағдайлар министрлігінің Telegram-арнасындағы мәліметке сәйкес, Алматыда «Қазселденқорғау» ММ-нің бес биік таулы бақылау бекеті жұмыс істей бастады. Олар келесі жерлерде орналасқан:
- Үлкен Алматы өзенінің алабындағы №13-бис және №10 көлдерде;
- Ақсай өзені алабындағы №8 және №9-10 көлдерде;
- «Күмбел» гидробекетінде (жоғарғы ағыста).
«Маусымдық бекеттер гидрологиялық жағдайды тұрақты бақылауды, көлдердің жай-күйіндегі өзгерістерді уақтылы анықтауды және қауіп туындаған жағдайда ақпаратты жедел жеткізуді қамтамасыз етеді. Мореналық көлдерді бақылау сел қауіпті кезең аяқталғанша тәулік бойы жүргізіледі», — делінген министрлік хабарламасында.
Бұған дейін осындай биік таулы бекеттер Алматы облысында орнатылған болатын.
Дереккөз: Nur.kz