Алматыда 18 шілдеде сенбі күні Summer Relay жазғы кешкі эстафетасы өтеді. Осыған байланысты қала орталығында көлік қозғалысы уақытша шектеледі, деп хабарлады қалалық әкімдіктің баспасөз қызметі. Биыл жүгіру алғаш рет Алматының тарихи орталығы арқылы өтетін жаңа трассада өтеді. Старт пен мәре Астана алаңында орналасады, ал маршрут Төле би, Қабанбай батыр, Панфилов көшелері мен Абылай хан даңғылы бойымен өтеді. Бес адамнан тұратын командалық эстафетаға қатысушылар жалпы ұзындығы 10 шақырым қашықтықты еңсереді. Балалар үшін 500, 1 000 және 2 000 метрге жүгіру ұйымдастырылады. Іс-шараны дайындау және өткізуге байланысты көлік қозғалысы шектеледі: 18 шілде сағат 9:00-ден 19 шілде сағат 6:00-ге дейін — Төле би көшесінде (Панфилов көшесінен Абылай хан даңғылына дейін); 18 шілде сағат 20:00-ден 23:00-ге дейін — Абылай хан даңғылында (Төле би көшесінен Қабанбай батыр көшесіне дейін); сағат 20:00-ден 23:00-ге дейін — Қабанбай батыр көшесінде (Абылай хан даңғылынан Назарбаев даңғылына дейін); сағат 20:00-ден 23:00-ге дейін — Панфилов көшесінде (Қабанбай батыр көшесінен Төле би көшесіне дейін). Жүгіру кезінде спортшылар Қазақстан Жазушылар одағының ғимараты, Құрманғазы атындағы Қазақ ұлттық консерваториясы, «Алматы» қонақ үйі, Жамбыл Жабаев ескерткіші, Абай атындағы опера және балет театры және Темірбек Жүргенов ескерткіші сияқты қаланың көрнекті нысандарының жанынан жүгіріп өтеді. Старттық бағдарлама сағат 18:00-де балалар жүгіруімен басталады. Сағат 20:00-де 2 шақырым қашықтыққа жүгіру, ал сағат 21:00-де негізгі Summer Relay эстафетасы старт алады. Ұйымдастырушылар алматылықтар мен қала қонақтарына маршруттарын алдын ала жоспарлап, уақытша шектеулерді ескеруді ұсынады, деп хабарлайды Almaty.news ақпарат агенттігі.
Дереккөз: Inalmaty.kz