Алматы қаласының әкімі Дархан Сатыбалды Мемлекет басшысының атынан «Вечерний Алматы» газетінің қызметкерлеріне мемлекеттік наградаларды табыстады. Биыл басылым 90 жылдық мерейтойын атап өтуде, деп хабарлайды Almaty.news ақпарат агенттігі.
Қала басшысы газеттің отандық журналистиканың дамуына, қоғамдық пікірді қалыптастыруға және мегаполис тарихын сақтауға қосқан үлесін атап өтті.
«Вечерний Алматы» – бай тарихы бар беделді қалалық басылымдардың бірі. Көп жылдар бойы газет Алматымен бірге маңызды тарихи кезеңдер мен оқиғаларды бастан өткерді. Қазақстан Республикасының Президенті Қасым-Жомарт Тоқаев басылымның бай тарихы мен ұжым еңбегін жоғары бағалап, бірқатар қызметкерді мемлекеттік наградалармен марапаттады», – деді Дархан Сатыбалды.
Мемлекеттік наградаларға басылымның он қызметкері ие болды. Журналистер мен редакция ардагерлері «Құрмет» орденімен, «Ерен еңбегі үшін» медалімен, «Қазақстанның еңбек сіңірген қайраткері» құрметті атағымен, сондай-ақ Қазақстан Республикасы Президентінің алғыс хаттарымен марапатталды.
Марапатталғандар арасында – Alatau Aqparat медиахолдингінің бас директорының орынбасары Әбдухалил Жәлилов, ол 1990 жылдан бері редакцияда қызмет етеді. Жылдар бойы ол кіші тілшіден холдинг басшыларының біріне дейін жол жүріп өтті.
«Ел Президенті Қасым-Жомарт Тоқаевқа, қала әкіміне және өз ұжымыма еңбектің осындай жоғары бағасы үшін зор алғыс білдіремін. Шынымды айтсам, күтпеген едім және қатты толқыдым. Редакцияға кәсіби жолымның басында кіші тілші болып келдім, кейін хатшылықта және коммерциялық бағытта жұмыс істедім. Бір кездері мені әртүрлі басылымдарға шақырды, бірақ мен сүйікті «Вечеркаға» адал болдым және солай қаламын», – деп бөлісті ол.
Марапатталған қызметкерлердің көпшілігі басылымның көп жылдық қызметкерлері болып табылады және газетке ондаған жылдарын арнаған.
Газеттің алғашқы нөмірі, ол кезде «Социалистическая Алма-Ата» деп аталған, 1936 жылғы 28 сәуірде жарық көрді. 1968 жылдан бастап басылым «Вечерняя Алма-Ата» деген атпен шыға бастады, ал 1993 жылы «Вечерний Алматы» деп өзгертілді. Газеттің бүкіл тарихында шамамен 15 мың нөмірі жалпы тиражы 360 миллион данадан астам болып шығарылды.
Елдің журналистикасы мен ақпараттық кеңістігінің дамуына қосқан үлесі үшін басылым бірнеше рет беделді наградаларға ие болды. 2004 жылы газет Қазақстан Республикасы Президентінің Алғыс хатымен атап өтілді, 2013, 2015 және 2023 жылдары «Жыл таңдауы» конкурсының «Үздік баспа БАҚ» номинациясы бойынша лауреаты атанды, ал 2014 жылы ҚР Журналистика академиясының «Алтын адам» сыйлығын алды.
Бүгінде «Вечерний Алматы» Alatau Aqparat медиахолдингінің құрамына кіреді. Холдинг құрамына сондай-ақ Almaty Aqshamy газеті, Vecher.kz, Aqshamnews.kz және Alnews.kz ақпараттық порталдары, Әлеуметтік желілер дирекциясы және Подкаст студиясы кіреді.
Дереккөз: Almaty.tv