Алматыда 18 шілде күні кешке Summer Relay жазғы эстафеталық жарысы өтіп, оған 1300 адам қатысты. Бірінші рет жарыс бағыты қаланың тарихи орталығы арқылы өтіп, Төле би, Қабанбай батыр, Панфилов көшелері мен Абылай хан даңғылын қамтыды, деп хабарлайды Almaty.news ақпарат агенттігі.
Спорттық шараға 1300 адам қатысты, оның ішінде 300 бала және бес адамнан тұратын 200 команда болды. Басты ерекшелік – жаңа маршрут. Қатысушылар алғаш рет Алматының тарихи орталығымен жүгіріп, Төле би, Қабанбай батыр, Панфилов көшелері мен Абылай хан даңғылы бойындағы белгілі мәдени және сәулет ескерткіштерінің жанынан өтті.
Негізгі пән 10 шақырымдық командалық эстафета болды. Әр қатысушы екі шақырымдық кезеңді еңсерді. Командалар ерлер, әйелдер, аралас, корпоративтік және кәсіби санаттар бойынша жарысты.
Балалар үшін ұйымдастырушылар жас ерекшелігіне қарай 500, 1000 және 2000 метр қашықтықта жеке старттар дайындады. Қонақтар үшін ойын-сауық алаңдары жұмыс істеді.
Жарыс барысында экологиялық бастамаларды енгізу жалғасты. Пайдаланылған пластикалық стақандар бөлек жиналып, кейіннен қайта өңдеу үшін ECO Network қорының серіктесіне тапсырылды.
Бес командалық санаттың жеңімпаздары естелік сыйлықтар мен жүлделер алды. PRO және Business санаттарындағы үздік командалар кубоктар мен ақшалай сертификаттармен марапатталды.
«Біз бұл маршрут арқылы Алматының тарихи орталығы ірі спорттық іс-шаралар өткізуге арналған алаң бола алатынын көрсеткіміз келді», — деді «Смелость быть первым» корпоративтік қорының атқарушы директоры Салтанат Қазыбаева.
Summer Relay 27 қыркүйекте өтетін 15-ші мерейтойлық Almaty Marathon-ға дайындық кезеңдерінің бірі болды. Биыл марафон маршруты 2018 жылдан бері алғаш рет Алматының орталық және тарихи бөлігі арқылы өтеді.
Дереккөз: Inalmaty.kz