Қазақстандық теннисші Зангар Нурланұлы Алматыда өтіп жатқан ATP 250 хард турниріндегі алғашқы матчында жеңіліс тапты, деп хабарлайды Almaty.news ақпарат агенттігі.
Жастар арасындағы елдің бірінші ракеткасы ATP рейтингінде 1308-орында тұр. Almaty Open негізгі сеткасына ол wild card, яғни ұйымдастырушылардың арнайы шақыртуы арқылы қатысты.
Бірінші айналымда Нурланұлы әлемнің 72-ракеткасы чех Томаш Махачпен кездесті. Қазақстандық 2:6, 0:6 есебімен ұтылды.
Теннисшілер кортта 1 сағат 3 минут өткізді. Осы уақыт ішінде Нурланұлы эйс жасамады, екі қосарланған қате жіберді және төрт брейк-пойнттың біреуін ғана пайдаланды.
Махач екінші айналымда бесінші себілген ресейлік Карен Хачановпен кездеседі.
Бұған дейін Нурланұлы жұптық разрядта Александр Бубликпен бірге бастады. Қазақстандық дуэт бірінші айналымда жеңіліс тапты.