Алматыда ТМД елдерінің парламентарийлері қатысатын шахмат турнирі басталды. Бастапқы тізімде 6 елден 47 қатысушы бар. Бұл жарыста жеңіске сенімді сөйлеген емес, тәуекелді есептеп, сабырлығын сақтай білген жетеді, деп хабарлайды Almaty.news ақпарат агенттігі.
Турнирдің ерекшелігі – қатысушылардың құрамы. Шахмат тақтасына Қазақстан, Ресей, Қырғызстан, Тәжікстан, Әзірбайжан және Беларусь депутаттары отырды. Олар күнделікті жұмыста заң қабылдап, мүдделер теңгерімін іздейтін адамдар. Шахмат олар үшін тек ойын емес, парламенттік жұмыстың әдемі метафорасына айналды.
«Біз үшін әртүрлі ел парламенттерінің өкілдерін қабылдау үлкен мәртебе. Біздің қала тарихи тұрғыдан халықтар достығының, мәдени алмасу мен халықаралық кездесулердің кеңістігі болып келеді. Бүгінгі шара осы игі дәстүрлердің жалғасы», – деді қалалық мәслихат төрағасы Мейіржан Отыншиев.
Турнирдің басты аты – Сергей Карякин. 2003 жылы ол 12 жас 7 айда планетадағы ең жас гроссмейстер атанып, Гинесс рекордтар кітабына енді. Бұл рекорд жиырма жылға жуық сақталды. Ол – старт тізіміндегі жалғыз кәсіби ойыншы.
«Турнир достық сипатта болса да, күрес оңай болмайды деп сенемін. Қызықты әрі күрделі ойын күтеміз. Ең бастысы – мұндай турнирлер елдер арасындағы достық пен ынтымақтастықты нығайтуға арналған», – деді Ресей Федерациясының сенаторы, гроссмейстер Сергей Карякин.
Парламенттік жұмыс пен шахмат арасындағы ұқсастықты Сенат төрағасының орынбасары Жәкіп Асанов атап өтті: «Депутаттың жұмысы шахмат партиясына ұқсас. Біз де өз қадамдарымызды есептеуге міндеттіміз. Бірақ бір елеулі айырмашылық бар: шахматта жеңілсең, фигураларды үстелден сыпырып, жаңа партияны бастауға болады, ал парламентте мұндай мүмкіндік жоқ».
Турнирдің мәні тек ұпай үшін күрестен кеңірек. Бұл – бәсекелестік тілі құрмет тіліне айналатын сирек сәт. Нағыз күш – кез келген бағамен мат қоюда емес, сөз бен шешімнің құнын түсінуде. Бұл – дана саясат, жақсы шахмат партиясы сияқты, әрқашан алдын ала ойлау қабілетінен басталатынын еске салады.
Дереккөз: Almaty.tv