Алматы әкімдігі Самал-3 шағын ауданы тұрғындарының Мендіқұлов пен Қажымұқан көшелерінің қиылысындағы жер учаскесін парк аймағына айналдыру үшін қайтарып алу туралы талабына жауап берді. Ведомство қалған аумақта жүзеге асырылып жатқан жоба жердің мақсатты пайдаланылуына сәйкес келетінін мәлімдеді, деп хабарлайды Almaty.news ақпарат агенттігі.
Әкімдіктің баспасөз қызметінің хабарлауынша, бұрын ауданы 0,5 гектар болатын учаске жеке меншікте болған. 2020 жылы оның иесіне көппәтерлі тұрғын үй кешені мен бизнес-орталық салуға алдын ала жобалау құжаттамасы берілген. Кейін жергілікті тұрғындардың пікірін ескере отырып, әкімдік бұрын берілген рұқсат құжаттарын кері қайтарған. Сонымен қатар, учаскені сатып алған инвестормен келісімге қол жеткізіліп, ол жердің жартысын – 0,25 гектарын қалаға тегін берген. Инвестор өз қаражаты есебінен жақын маңдағы үй тұрғындарымен алдын ала келісілген жоба бойынша саябақ аймағын да жабдықтаған.
Учаскенің қалған 0,25 гектар бөлігінде меншік иесі – «Шоқан Уәлиханов атындағы жеке мектеп» ЖШС іргелес аумақты абаттандырумен жылыжай салу жобасын іске асырып жатыр. Әкімдікте жұмыстар сәулет және қала құрылысы басқармасы берген алдын ала жобалау құжаттамасы негізінде жүргізіліп жатқанын және жер учаскесінің мақсатты пайдаланылуына сәйкес келетінін атап өтті.
Әкімдік жоба күрделі ғимараттар салуды көздемейтінін, учаске жеке меншікте болғандықтан және оны пайдалану белгіленген мақсатты пайдалануға сәйкес келетіндіктен, берілген алдын ала жобалау құжаттамасын кері қайтаруға негіз жоқ екенін атап өтті.
Дереккөз: Inalmaty.kz