Алматыдағы Наталия Сац атындағы Мемлекеттік академиялық орыс балалар мен жасөспірімдер театры күрделі жөндеуден кейін қайта ашылды. Жаңартылған ғимарат тарихи сәулетті сақтай отырып, заманауи инфрақұрылыммен жабдықталған, деп хабарлайды Almaty.news ақпарат агенттігі.
Журналистер жаңарған театр ғимаратын алғашқылардың бірі болып көрді. Таныстыру фасадтағы аты аңызға айналған мозаикадан басталды, оны әлеуметтік желілерде көпшілік сақтап қалуды сұраған болатын. Фойеде мозаика толығымен сақталған, бірақ тазартылып, бүлінген жерлері қалпына келтірілгендіктен, жаңа реңкке ие болды. Фойеде бұрын болмаған жалғыз элемент – едендегі сурет.
Осы кезде залда «Сац. Қайта оралу» қойылымының репетициясы жүріп жатты. Әртістер театрдың ашылу күні – 7 қарашада өтетін гала-концертке дайындалды. Үздік қойылымдардан үзінділер мен қатысушылардың эмоционалды ойыны интрига тудырды.
Тарихи ғимараттың жанында театрдың жаңа корпусы ашылды, онда 1986-2005 жылдары театрды басқарған аты аңызға айналған режиссер, Қазақстан мен Ресейдің еңбек сіңірген қайраткері Борис Преображенский атындағы камералық сахна орналасқан. Black Box форматындағы трансформер сахна 260-қа жуық көрерменге арналған. Оның икемді жоспары қойылымның ойына қарай алаң мен көрермен орындарының орналасуын өзгертуге мүмкіндік береді.
Заманауи ғимарат кеңірек және функционалды болды. Мұнда үлкен және екі шағын репетиция залы, балет сыныбы, цехтар, қоймалар және басқа да пайдалы кеңістіктер орналасқан. Реконструкцияға дейін ғимараттың жалпы ауданы шамамен 9 мың шаршы метр болса, жөндеу және жаңа нысан салудан кейін бұл көрсеткіш 25 мың шаршы метрге дейін өсті.
Реконструкциядан кейін театр тек қойылымдар алаңы ретінде ғана емес, сонымен қатар заманауи Арт-Орталық – шығармашылық эксперименттер, жаңа идеялар мен мәдени жобалар үшін креативті кеңістік ретінде дамуды жоспарлап отыр.
6-8 қараша аралығында көрермендерді «Кот в сапогах» және «Страсти по Шекспиру» қойылымдары, сондай-ақ жаңартылған театр кеңістігінің ашылуына арналған концерт күтіп тұр. Ал 7 қараша – Наталия Сац атындағы театрдың туған күні. Осы күні көрермендерге театр мерекесі мен жаңарған ғимараттың ашылуына арналған «САЦ. Қайта оралу» гала-спектаклі ұсынылады. Қойылым атауы символдық мәнге ие: реконструкциядан кейін театр дәстүрлерді сақтай отырып, өз сахнасына оралып, тарихында жаңа бет ашады.